2001.10.21~2001.11.03
Hello Kitty日本迷失之旅之一部曲
| 幾時 | 去左邊 |
| 2001.10.21 | 香港去東京(NW18 - 0830/1345) |
| 2001.10.22 | 東京至新大阪 |
| 2001.10.23 | 大阪去京都，去奈良，回大阪 |
| 2001.10.24 | 新大阪去廣島，去博多，去西鹿兒島 |
| 2001.10.25 | 鹿兒島去櫻島，回西鹿兒島，去熊本 |
| 2001.10.26 | 熊本去阿蘇，去大分 |
| 2001.10.27 | 大分 |
| 2001.10.28 | 大分去山口，再去高知 |
| 2001.10.29 | 高知去岡山，再去新神戶 |
| 2001.10.30 | 神戶去元町 |
| 2001.10.31 | 新神戶回東京 |
| 2001.11.01 | 東京 |
| 2001.11.02 | 東京至橫濱，再回東京 |
| 2001.11.03 | 東京返香港 (NW17 - 1815/2225) |
好慘呀！四點鐘起身繼續執行李，因為要趕上城巴機場快線第一班五點半鐘由北角開出的巴士A11，好彩一切順利，不過湯米差點忘記行李鎖個密碼，佢好努力咁試左一陣，終於起巴士到之前開到啦！
無驚無險大概起日本時間下午一點二十分到左日本成田機場Terminal 1，在JR取了JR PASS，坐兩點四十三分班Nartia Express 去東京，黑紅的椅子，白色的車身，嘩！好開心呀，我地起日本啦！
湯米起車上面忽發奇想，話不如先去有樂町買Kitty，再去上野日光館Check-in，終於我地起東京站落車，就即刻轉車去有樂町，拿住兩個大行李仍然買左兩大袋Kitty，仲用150分換左起香港買唔到的Memo Pad Set，好開心喔！
去到日光館放好行李，就起程去池袋，途中起am/pm買左兩個菜肉包同埋一個咖喱包，真係講都唔信佢可以咁好味！去到池袋先去東武B/F同埋7/F走左一圈，再去Sunshine City進發，途中起站內買左Kitty人形燒公仔，又起另一間Gift Gate買左小小Kitty．到左Sunshine City好唔容易搵到SaniroYa，買左池袋限定Kitty系列同埋其他野，仲買左個價值Yen35,000陣店之寶∼巨形羽紙板．
湯米話要去玩具反斗城睇下，買左龍貓DVD，超人同埋Kitty，我好累坐左起HMV度聽歌，湯米就起裡面搵CD，九時鐘左右就歡天喜地咁抱住一袋CD出來，我地去左松屋食牛肉飯，之後就返日光館執行理，沖涼進快休息啦．
第二日 ~ 10.22.2001 ~ 星期一（好天，不過有雲）
坐七點半車由上野去大阪，起am/pm買左三文治起車上面食，Higari102號經明古屋往京都最後到左新大阪，再去大阪站先將行李放好起Locker (Yen400 ~ 可放入Kitty行李同埋大背包．
我地先去環球片場，入場費要Yen5500，好貴喔！都要入架啦！入面D設計好靚，好新，好大，不過想玩咩野都要排成粒鐘，有D仲要預訂票，我地得個小小時間，邊得閒同你玩排隊喎！唯有盡快晒佢，影下相咁啦！都開心架！之後仲買左Hollywood Kitty買左D當地限定Kitty先走，回程起西九條食左他人井同埋豬扒井，好好味，又起弁天町郵局寄左名信片比肥老豆同埋瘦媽．之後轉地鐵ATC線無人駕駛火車去ATC Vivitix，又買左D Kitty，回程前左個肉包，好好味喔！
到本町轉車去岸和田，好累喔！落車仲要行十分鐘，經過一條有圓拱形頂的大道，再向前行就見到Can Can，終於搵到1/F Gift Gate啦，但岸和田Kitty就唔多喎！回程去大阪站取回行李，起程去道頓崛酒店，仲差D行錯路呀！到左酒店Check-in放好行李休息一陣，又出發啦，起道頓崛街頭買左蟹公仔，又影左相，一路上睇到好多挾公仔機，起橫街有小舖，我地食左墨魚丸，又食左燒肉湯麵，個檔口又有特色，D野又好味，食得好飽，累到死，一落床就起唔番身．
起難波JR麥當奴食魚柳飽餐，之後由難波去茨木，轉巴士去萬博公紀念公園，起西口落車，行去中央口，一路兩旁的樹好高好高，我地起公園標記度影左相，湯米父母起十幾年前都起同一個位置影左呢副相，我地特登起同一個地方影番張一副一模一樣的相，好開心喔！之後去日本庭園站前，坐巴士返茨木站．起猛烈陽光下，湯米背住大背包，我路後面行左一條好長好長的石路，終於到左 Warner Cinema My Cal，好辛苦呀！咁辛苦都係因為有間Kitty Shop 起度啦！
之後去京都，起站裡面已經忍唔住買左堆地區限定Kitty，再坐地鐵去四條站另一間Kitty Shop，仲有Kitty工房，嘩！發夢咁，好靚好多，我真係來左 Hello Kitty 工房啦！梗係又影左好多相，仲買左好多剩係呢度有得賣的Kitty啦．
肚餓啦！去左超級市場買左菘茸腐皮壽司，炸豬粒同埋薯餅，坐火車起京都去奈良個陣食，好味道喔！慘！唔記得帶Kitty Shop Guide，咁就坐巴士去鹿苑，用左Yen100買鹿餅喟鹿，覺得好好玩，佢地個口好大，對眼又好大，個鼻好濕，仲好喟食架，追住湯米同我，仲用個頭撞湯米喎，真係好開心，好好玩．
之後坐巴士返近鐵奈良，湯米問左兩個女學生邊度有Hello Kitty Shop，佢地好好人帶我地行去一間附近好雜的Kitty Shop，湯米送左一條買左相同的電話繩比佢地作為謝禮．Kitty Shop 個老板娘仲教我地點樣去另一間Vivitix，我地坐近鈑鐵去，好容易就搵到，D日本人真係好好人架！
回程時去埋通天閣，不過我地太夜到，佢地已經關門，不過我真係諗唔到咁矮建築物都敢叫自己做通天閣，真係服左佢．我地起附近行左一陣，之後就去梅田Hello Kitty Shop，呢度真係有好多好多地區限定Hello Kitty，當然又買左一大堆，好累，返道頓崛酒店小休，又再行去難波站取明天的車票，學識左有樣野叫"Pair Seat"．之後，食左炸雞同埋豬扒定食．
大清早從近鐵難波站去新大阪往廣島，locker用o左 Yen600．到o左廣島搭市內電車往原爆圓頂前，在原爆公園行o左一陣，見到原爆遺跡同埋標本，覺得好恐怖，好心寒，之後再坐電車返廣島JR站．換o左好一D車票，起程前去超市買o左鐵板炒麵，肉包，好好味！
之後上車去博多站，起站內發o左狂買Kitty，將行李放好起locker，之後就步行去第一間Kitty Shop啦，是一間好大的商場，裡面有好多好多新奇小玩意，我地起呢度逗留到六時幾，有個難鬼 Information Counter 姐姐自己唔識路又亂點人，好在我地冇中佢計！
我地又步行去天神地下鐵站，轉車去第二間Kitty Shop，位於褔岡Dome側，一個非常宏偉的建築組合，可惜冇完善交通配套設施，我地要起地鐵站行成十五分鐘先去到，又冇穿梭巴士，路上又發現玩具反斗城，先去搵Kitty Shop，又買o左小小咁啦，再返玩具反斗城同埋HMV，湯米起裡面買唱片，好開心．
今日真係滿載而歸，之後就拖著疲倦身軀坐巴士返博多站，途經Lawson食o左荷包煮，都不知幾好味．
去到博多站決定要重新整理行李，我地去o左家香雞用o左兩個字執行李，現後就坐夜車去西鹿兒島啦．唔係有好多人會坐夜車，所以都有好多吉位，慘啦！站站停呀！有D站仲會停好耐，真係無辦法入睡，小休一陣又醒，一陣又過一個站，剩係覺得週身痛，冇力，好酸痛喔！尤其是條腰更係劇痛喔，(~_~)!
終於到o左西鹿兒島站啦，嘩！都未多清晨六點鐘，我地先鎖好行李起locker，然後就準備搵市內電車站啦．起火車站前好容易就搵到市電啦，我地去水族館站，之後又好容易咁搵到碼頭搭船去對面櫻島，三層船有藍色底部，下層係停車架，中層係比人坐架，彩色長梳化，仲有電視，我地上o左頂層比較開揚，感覺好似好接近櫻島火山同埋個海咁，坐起船邊椅子上，食三文治做早餐，櫻島火山就起我後面，前面仲見到剛才岸邊水族館，好漂亮的清晨喔！
到o左櫻島碼頭落船，每人比o左 Yen160船費，起碼頭側邊搭巴士去櫻島觀望台火山博物館，呢生人第一次親眼見到火山，真係好興奮喔！之後巴士回程返碼頭，可惜冇機會見到正大根，係有D遺憾喔！我地再坐市電去天文館通搵Gift Gate，問郵差叔叔，好容易就搵到，仲買o左套Kitty現具，再返鹿兒島站往熊本，起站內買o左腐皮壽司同埋炸魚餅，起車上面食當做午餐啦．
到o左熊本，我已經累得冇晒力，落車時起窄路上有一個日本男力同和我爭路行，我激鬼氣好用力狠狠咁撞o左佢一下，仲好凶咁望o左佢一眼，佢就好驚咁行o左去，我好似覺得自己好似起異地打o左場勝仗咁，成個人都精神D啦．
我地轉電車去Hotel法華Club，check-in後放好行李就起程去熊本城，正好有一班人起度準備表演台，我地向天守閣進發，好彩佢地延長o左開放時間到晚上八點半，我地唔會因為遲o左入唔到去．城裡面有好多古時用具，戰爭武器．城本來用木建造，但係經過長年累月風吹日晒，好多地方已經改用石屎建築，行上六層高的天守閣，睇到熊本城夜景，呢個亦都係我同湯米想到的地方，好美喔！
我地再去下通搵Gift Gate，但係搵唔到，決定先食飯，我地食o左咖喱飯，好好味，好開心．比錢時問老板點樣去Gifi Gate，老板仲好好心幫我地打電話去問佢地點去，原來就起呢間食店轉左就到，我又買o左 Kitty玩具同埋手錶，臨離開Gift Gate前湯米比地下一條電線click到，電線斷o左，我地即刻道歉，店員仲笑笑口多謝我地來．真係好感動．
我地再去Record Tower睇唱片，路經Kitty Big Echo影o左相，湯米冇再買唱片，我地就回程返酒店啦，跳上電車，原來只係坐一個站，哈！傻瓜！
傻更更較錯鬧鐘，四點九起o左身梳洗，執好行李叫湯米起身，湯米梳洗完先發現先至五點幾，我地決定返上床再休息多陣至六點半再起身，check-out個陣先知道有coupon唔使比房租，又慳番Ｄ．到o左熊本站，站長話今日冇火車去阿蘇火山，方寸大自亂之際，湯米發現原來今日冇Aso Boy火車，唔係冇普通火車，真係比佢嚇死啦．我地坐普通火車去阿蘇，現後用o左Yen10,000包的士去阿蘇火山．
先到米塚，佢係火山爆發個陣爆出來架，細細個山仔，兩面好平均，又圓圓地，好得意，之後去阿蘇火山博物館，因為火山正在活動放出大量硫磺，所以唔可以上山，我地只可以行一陣就要離開，好失望．就起將要離開個陣，山路重開喎！的士司機即刻帶領我地上火山觀景台，好利害喔！我地起呢度逗留o左好耐，四圍行，又影相，仲執o左D火山灰做紀念品．差唔多十二點先走，的士司機接我地返阿蘇站．
我地又起阿蘇站附近行o左一陣，我地起一間好似好高貴餐廳度我食o左親子井，湯米食o左明太子意粉，好high喔！好好味喔！
之後由阿蘇站去大分，先去Hotel法華Club check-in放好行李，就到大分站前Gift Gate，湯米路上發現好味的炒麵蛋，Master仲好好人．又好味，又走入廚房同老板影相，好開心喔！
八點鐘起身起酒店十樓食自助早餐，食得好安樂！我地去Gift Gate門口補番影相，再由大分龜川站搭的士去Hello Kitty Hotel，大約用o左 Yen1000，仲起個度買o左限定結婚公仔套裝，又影o左相就離開，我地步行去豐後豐岡站，路經好多鄉郊小屋，再過兩個站就係日出站啦，但係又冇車接駁，只好搭回頭車返龜川站，終於搵到車去杵築站啦，巴士時間又唔fit，唯有搭的士啦，幾經辛苦，終於去到HarmonyLand啦！到場剛剛睇到大型歌舞，好精彩，Kitty仲好靚，我當然失控買o左好多Kitty啦！真係好多，好多好多！差唔多到關門時間五點啦，最後一班巴士已經起四點半開出，冇辦法唯有又搭的士返杵築站，拿住一個滿滿的包包再去中津搵Kitty Shop，徒步行o左三個字，唔難搵，但係好累喔！起三樓Gifit Gate又買o左D Kitty，湯米就睇o左一陣CD，然後就返酒店．
我地決定起酒店地下洗衫，Yen50買洗劑，Yen200洗衫，一路都好順利，不過乾衣就慘啦，用o左Yen600，仲要等到零晨四點半先收得番衫，個機short short地，後來轉用隔離個先攪掂．
湯米好細心，佢去吉野家買外賣做晚餐，仲特登買埋朱古力雪糕比我食，我地一齊食，好好味，好溫馨喔！之後又執行李到成兩點，沖完涼即刻睡啦，聽日要坐七點三車去小倉喔！
第八日 ~ 10.28.2001 ~ 星期日（黑雲，落大雨）
清晨四點半起身收番D衫執行李，再小睡一陣，checkout個陣比o左Yen5000電話費，好貴喔！湯米件大型行李個碌爛o左，拉鏈又壞，迫住佢要成件行李包起來行，真係慘，我都睇到好心痛．湯米起車站買o左三文治，我地起車上面食為早餐，約八點鐘到柳ke浦．（USA站＝宇佐＝柳ke浦站）．
小倉去小郡，去山口，去小郡，去岡山，去四國的高知，就係今日行程，勁呀！到o左山口，呢個站唔係好荒蕪，但係我地都冇諗過去Youme Town 要轉巴士，仲唔知有幾遠，我地冇足夠時間，只好起站前行下就番小郡，(~_~)!又因為睇錯o左月台，比班火車走o左，又冇第二班fit到行程的火車，只好搭的士返小郡，路經都係一D鄉郊小路，一步一驚心喔！最後用o左成Yen4000先返到小郡，都係我的錯！對唔住喔湯米！浪費錢亦浪費時間，好在起小郡好順利就搵到車返岡山，而由岡山去高知亦都好順利，不過禁煙卡已經滿座，我地坐吸煙卡自由席．
一定要一提的係我地架車經過o左瀨戶大橋，一條好長好長的橋，橋下的水都有旋渦，唔係風平浪靜，好靚，好靚，嘆為觀止！到o左四國著陸啦！先見到一個大型的渡假Club，妤似 ClubMed Feel，之後就一堆堆油庫，煤，發電廠，船塢咁，架火車越行遠一D，四圍就荒蕪一D，仲見到起好遠度有個好靚的山脈，好長，但係好平，好得意！架車一路向前，我地已經累得睡了，我一覺醒來望下出面，眼前係一副靚到令自己呆o左的美景，我真係睇到呆o左，我咁大個人都未見過咁靚靚風景！我真係比佢深深吸引住，一D睡意都冇啦，好似發夢咁！好似卡通片入面畫個D畫面咁，我諗我呢一世都唔會忘記！
列車起途中因為避車停o左一陣，大約遲o左五分鐘起五點廿四分到達高知，真係估唔到呢度竟然會有一位操流利英語姐姐仔起Information Counter，同我地溝通得好好，仲比o左地圖我地，好容易就搵到酒店啦，去JR站取聽日車票，又再去Information問下醒目豬姐姐點樣去Aeon和桂濱．我地向北行十五分鐘就見到Aeon，呢個係一個大型現代化商場，仲有吉之島，我起呢度買o左Kitty，湯米又行o左唱片鋪，仲起超市買o左全套Kitty T-Shirt玩具果子．
回程不係好夜，但係就冇咩街燈，四圍好黑，我地先返酒店休息再去食飯，但係搵o左好耐，行o左好遠，終於搵到一間可以稱得上史上最強的咖喱飯店，呢度D鐵板咖喱飯真係唔錯！
返到酒店累死啦！腰又痛，浸o左一個熱水涼，爬上床就即刻睡著．
一早起身，執好行李就出發去高知城．我地坐火車再行十分鐘就到啦，高知城唔係好大但係好靚，只可惜時間唔多，唔可以等到九點佢開門行埋先走，有小小憒憾．我地回程返高知站試搭Ding Ding，途中仲買o左一D紀念品，又係Lawson見到高達書，起巴士站前等o左一陣就坐一號巴士去桂濱，車程四十分鐘Yen610，途中好多<小人>相伴．．．好煩就真！
到o左桂濱，略過板本龍馬紀念館到桂濱站，先去龍馬像，再去沙灘，龍王岬，四國最南端的風景真係好靚，我地行o左一陣，仲食o左雪糕，好味，心情都好好！回程個陣買o左土佐犬紀念品，坐巴士返高知站又預到班<小人>，呀！好煩呀！終於趕得及返酒店，但係就要比超貴房租，原來佢地比個全個酒店最貴房我地，我梗係嘈啦，最係discount埋都要比Yen17000，好慘，比人斬到一頸血！
之後去站內的拉麵店食拉麵同埋炒飯，好好味，一點半坐緊火車去岡山．到o左岡山，轉新幹線去新神戶，再轉地鐵，但個站太大啦，很難搵到適當地鐵入口，起大商場裡面發現Vivitix又買o左Kitty，帶來D袋開始頂唔住爛爛地啦，又擔心，行李又重，仲行o左好遠，好累，冇力，好慘！好唔容易終於搵到Kobe Plaza Hotel啦，死人頭比間貴房我住，要比成Yen15000房租，明明有平房又死都唔比我，谷鬼氣．自己又累得再行唔郁，無奈都比o左兩晚房租，拿拿臨上房放好行李休息．
我地由神戶站向海邊遊樂場方面行，一個又一個大商場，搵到Gift Gate，我買o左Hello Kitty大褸，仲起Daiei日本國貨公司用Yen8900買個大行李箱，又平又正，湯米仲買o左三件長袖圍衣，最開心就係湯米啦，佢唔使再由朝到晚抱住個又大又重行李包啦．佢真係太辛苦啦，聽日佢就可以舒服好多啦．我地仲食o左特價Yen1000神戶牛柳，湯米食o左任食白飯三大碗，好勁！累到死，返酒店休息啦．
晨早起身第一站係舞子公園，起火車上已經好清楚睇到鳴門大橋，落車後心情就更輕鬆啦，可能因為天氣好，環境又舒服啦，我地起McDonalds食早餐，仲飲o左冇粟米的粟米湯，都幾好味！可惜今日係呢度定休日，冇得入去D建築物入面，不過又意外咁發現孫中山紀念堂，好意外喔！睇住舞子塔個大圈圈升到上半空，真係好想上去睇，可惜就係定休日冇得入啦！之後我地起鳴門大橋附近散步，發現仍然起緊的玩具反斗城，又起國貨公司行o左一陣，冇咩發現就走啦．
再去大久保站搵Kitty Shop，因為冇地圖，站裡面又冇指示牌，湯米懷疑D資料有錯，我地決定離開再去姬路城，轉山陽電鐵去天滿搵Kitty Bu Bu房中華料理，終於搵到啦！夢想成真啦！開心死我啦！我地又食野影相啦，又買o左當舖限定品，回程返姬路搭新幹線去新神戶，轉JR去寶塚，車程要兩個鐘，轉六次車，終於起下午四點半到o左手塚治虫紀念館．
裡面唔係太大，但係就有齊手塚治虫歷史同埋手稿，睇完之後，更加佩服佢咁有才華，我買o左D藍寶石王子Postcard留念，上次來日本來唔到呢度，今次真係來到啦，真係有心滿意足感覺．之後我地仲起寶塚一帶行o左一陣，回程時起豬名寺站落車搵Kitty Shop，經過學校，Golf場，到西武大商場，搵到Kitty Shop，已經再搵唔到咩特別Kitty啦，不過都買o左一個Kitty BB公仔，我想拿一張計分咭作紀念喔．然係就返酒店休息．本來仲想去甲子園同埋海邊一間Kitty Shop，但因為真係太累，腰腳都好痛，行唔到啦，唯有忍痛取消呢兩點啦．後來先知道原來湯米好想去甲子園走走，如果我一早知道，累死亦會去一趟．
起酒店附近Family Mart買飯團，又過馬路去靚姐姐度買燒墨魚丸同埋豬肉包番酒店食．好飽喔！起床上趟一陣，沖涼後執行李，聽日起程返東京啦！
原來朝早由新神戶番東京D火車係好爆架，我地只好搭十點鐘Hikari 114號番東京啦．
因為搭十點鐘車，今日唔使咁早起身，約八點鐘去外面行一圈，發現南京町，又起一間餐廳食o左洋朝食，就返飯店取行李，去元町，再去三no宮，再去新神戶返東京．到東京，即刻轉山手線返上野日光館．MaMaSan竟然記得我個名，問我Ecour des ga？嘩！好感動喔，試問除o左日光館，起日本邊度可以搵到一間旅館咁有親切感，好似番屋企咁喎！其實日光館已經好破舊，但係我真係好鍾意呢度，又平又有份親切感，第二度溫唔到架！
我地放好行李就出發去川崎，呢度有Kitty Shop，亦係Saniro Headquarters Office，我地好容易就起Basement 搵到間Shop，買o左被竇Kitty，佢好似好舒服咁樣架！然後就去對面寫字樓搵Saniro office 啦．我地先去20樓，心裡面有D慌，因為呢度係人地公司，唔係開放比人參觀架，升降機門一開，就馬上見到好多好靚Kitty公仔，左望望，右望望，仲有好多人起度做野喎．我地走入秘書課，嘩！好靚呀！邊有一個寫字樓咁靚架！不過見唔到人喎，我地尊重對方，所以按鐘，有一位靚靚秘書姐姐出來，我自我介紹話只係想影幾張相，佢仲幫我地影合照，我話我地自己再影多幾張就會走，佢就好安心咁番入去．
我地再去18樓，只係望o左一望就比一個男人截住，仲帶o左我地去21樓一個好似飯堂咁地方坐底叫我地等一陣．佢就去o左另一間房，呢個時候，我見到一個攝影司起度影緊野，只係見到粉紅色紗，咩都睇唔到！第o左一陣，有另一個男人過來同我地講呢度係寫字樓唔開放比外人參觀．我冇我望，仲更加努力咁話佢知我係Kitty痴，特登起香港來都只係想影下相，我仲比o左我個網頁佢，又比o左咭片佢，佢清楚知道我唔係行家來做間碟就放心，仲帶我地去18樓幫我地影相，仲帶我地行o左寫字樓一圈，略略介紹下，其中左邊係佢地設計部，正在設計明年夏季新產品，之係又去樣板部．到升降機門口我仲同佢影合照，等佢有機會記得我．超開心，心情超高漲步出大樓．再向淺草進發．\(^_^)/
我地先去松屋，有咩特別，再去Rox湯，行o左好遠，差唔多行晒成條新仲見世通見到超人像先至到，走入去，升降機去到七樓但見唔到Kitty Shop，我地返地下搵，又搵唔到去六樓的升降機，只好再去七樓問問．一問之下，原來我地需要先比Yen2300入場費，入場之後先可以去六樓買Rox限定Kitty公仔．當然我會比啦，雖然Kitty Shop因為夜已經關門，我的堅持都感動o左職員幫我落六樓取一個大公仔，兩個小公仔同埋大小毛巾各一條，係比多o左錢，但我覺得好值得．
開開心心咁回程，途中又買羽子板，番上野食咖喱飯，湯米今日都起秋葉原買o左Akira DVD同埋起有樂町買o左 CD，我地兩個都滿載而歸，開心到極！最後仲去o左月島食Kitty燒，覺得老板娘老o左好多，帶上眼鏡，好似好忙咁．我地食o左炒野菜大盛，瓜卷湯同埋燒腸仔，好熱呀！面都紅晒啦！好飽呀！離開前仲買o左Kitty燒，老板娘仲送o左剷仔比我，好開心．
多麼興奮的一天喔！
又係一個天色晴朗好日子，我地先去都廳，因為湯米要帶我去45樓展望台，原來仲有都廳限定Kitty喎．呢一個宏偉建築物，仲包括各政府部門重要的辦公室，正在嚴厲的安全措施實行中．
之後我地就起程去Saniro Puroland啦，約大半個鐘車程，到場買o左入場券，第一件事就係去三間Kitty Shop，再睇睇Kitty House，又睇o左一陣歌舞表演．起Kitty House外面細舖仔買o左D新公仔，發現一個從來未見過生日公仔，一問之下，原來係11月30日至12月尾參加Kitty生日會，比Yen2500，個公仔就當禮物送比參加者，即係話而家有錢都買唔到．
失望之餘去其餘兩間Kitty Shop買其他野，又趁機會同Kitty影相，我地又去二樓挾公仔，發現獎品包括"湯Kitty+Daniel公仔"．湯米決定現射籃，有十足把握．我地總共用o左Yen3000就取得全套兩個大公仔Set啦！湯米好利害喔！再用Yen300玩多一次，玩埋兩個Kitty掛頸獎牌比我，好感動喔！仲好佩服佢喔！好犀利喔！
離場前又見到Kitty，即刻再同佢影相，好開心咁就離開o左 Hello Kitty Land 啦！（起場內見到Super Jupiter個肥妹）
我地先返新宿買企鵝筆比文迪，又起新宿Isetan買o左限量阪生日Kitty 公仔．就起程去飯田橋，因為湯米要幫朋友買ANA紀念品．唉！終於搵到個舖啦，點知佢休息喎，白走一趟咯！再去涉谷，先起站內店買新金色Roller Kitty，又去109-2地下Vivitix睇o左一陣，不過冇野好買．
湯米先讓我舒適咁起McDonalds坐下休息下，佢就去Tower Records同埋HMV買唱片，最後返上野一個上樓麵檔食湯麵定食再返日光館休息．
第十三日 ~ 11.02.2001 ~ 星期五（好天）
去o左茅之崎站，因為百貨公司裡面有Gift Gate，之後轉巴士去海灘，估唔到意外地發現o左一個咁靚的海灘，散步，睇人吊魚，我舒服的海風喔，之後我地行返車站，好遠好遠，諗唔到咁遠，有巴士都唔上，抵死，唔抵可憐，足足行o左成粒鐘，好慘！之後再去藤澤Gift Gate，途中又買o左好平手套，仲免費洗眼鏡，再去東戶塚Gift Gate，櫻木町Vivitix，再去新橫濱站，去o左拉麵博物館，食o左兩個湯麵，超好味！仲食o左一個蛋同理雪條，飽死我啦！
回程返上野，起徒町落車，再行返上野，起吉池買o左超大袋，仲有大量北海渡Kitty，同埋酒板比三佬，再去二木之果子買手信，玩具舖買Kitty電話繩，返酒店執行李．
朝早拿拿林執好行李，MaMaSan就出現來執房啦，我地將所有行李搬落樓下玻璃房鎖好，湯米再去ANA舖幫朋友買紀念品，我就自己留起上野行01City同埋附近D檔口，我又買o左髮圈同埋襪桶．
湯米好慢喔！佢比約定的時間遲o左返來，好彩仲趕得切去機場，到o左機場check-in行李，嘩！超磅要比多六萬幾Yen，妤慘！好慘！
最後一擊我地再去機場商店買o左多多Kitty，又食荷包煮，朱古力爽同埋腐皮壽司，好好味喔！上機返香港啦！日本Bye-Bye啦！我好唔拾得走喔！