嘩！一早起身已經八點半，唔知醒喎！尋日實在係太累啦，唔緊要啦，我地決定唔去靖國神社，橫掂我都唔想去．

一出門口，梗係唔少得去便利店買個肉包食啦，之後就起程去城成學園國立成育醫療中心，個度入面有獨家Kitty賣架！好容易就搵到個巴士站，去到先知佢今日休息，無計啦，人地不定休我地都撞到正，唉！有冇攪錯！真係唔好彩啦，激死我啦．

唯有好無奈咁離開啦，去下一站經堂，起個度間Gift Gate買o左Kitty蘋果銀包，影o左相，就起程去下北尺．呢度冇咩特別，又落雨，心情唔係好好，搵到間懷舊玩具店，行上去見到D野真頭舊到佢識我，我唔識佢，我地決定不如早D去三鷹龍貓村．我地好快搵到個龍貓村巴士站，仲有少少時間起三鷹行一陣，買o左＜爽＞的替身朱古力雪糕，行o左入麥當奴入面坐低食．

我地用o左Yen210坐巴士入龍貓村，到o左之後要排隊換入場券，使唔使咁巴閉呀？換入場券都要對passport，不過其實如果大家想來龍貓村，係先要起出發前起香港JCB訂定，然後到預定當日到場憑收據換入場券架，而起JCB定飛個陣就要比埋passport佢睇，所以到場之後要對passport都真係唔出奇架．

我地起入面行o左好耐，都算好多野睇，真係大開眼界，原來要製作一套動畫真係好複雜架，我覺得自己真係學到D野，可能會幫到我將來做自己D作品架．我地買o左D紀代品，包括三盒龍貓比文迪，湯米都買o左D貼紙同埋兩本書，又影o左D相，不過要行個條轉轉梯真係頭暈眼花腳掁掁，不過講真，龍貓村真係一個好值得去的地方，可惜幾乎全程都唔準影相，簡單D講就係逢室內都唔準影．要靠自己個腦去記住每一樣野啦．

回程我起吉祥寺Sanrio屋買o左D地區限定Kitty，不過走兩檔(Sanrio屋同埋Isetan Gift Gate)，始終都換唔到10月份Kitty公仔，真係好慘，Isetan有公仔，但剩係可以用佢個間D分先換得，Sanrio屋D分就有大把，不過佢地就冇10月公仔，吹脹！

唯有回程去新宿出埋D JR 飛啦！之前已經起吉祥寺站出o左D架啦，不過太多驚個個人頂唔順，咪係新宿出埋剩番個D囉！大站點都好D架．D人做野冇咁蠢嘛！不過個D姐姐都幾慘，幫我出飛攪到冇晒氣咁，仲要好似好唔好意思咁，換o左一大疊飛返上野，好在新宿個JR Counter開到11點，如果唔係我都有D驚出唔切咁多飛架．

我地起上野松屋快快趣食o左飯就返日光館，途中又執o左個紙箱，遲D要寄野嘛！

湯米返到日光館仲幫人整番個電視機，我就係咁執野，累死人啦．