湯米病o左啦！(>_<);

朝早到便利店，點知買唔到葯，唯有買o左兩個熱包包，保礦力同埋咖啡上火車做早餐，架火車係Shinano 2號3號車廂9CD位，係禁煙架，路經松本站，好多人上車喔！到歸城市生活啦，成個人都好累啦，湯米又唔舒服，我地決定取消濱名湖同松本行程，在名古屋行一陣就算啦．

我地先將行李放好起locker，然後就起程去金山站轉地鐵去御場町，起松板屋買o左散步道Kitty，仲有少少其他Kitty，之後去o左Gundam Zone，買o左兩個好重的公仔架，湯米就買o左整模型D工具，我地嚐試去寄，希望唔使帶咁重行李，點知去到郵局發現佢地冇包裝工具供應，只好暫時帶住啦，好重喔！

我地又到地鐵港町役所站，落車之後先肯定要行好遠先可以去到一間Kitty Shop，梗係唔去啦，累死人啦．又起名古屋站地下街搵到Gift Gate，買o左兩個聖誕Kitty同埋Daniel，仲有三個細公仔，之後見到龍貓舖頭又買o左門簾同磁石比文迪，仲影o左D相，都幾開心．

回程起地下街一間時裝店門口執o左個紙箱，又起附近一間文具舖買o左膠紙同埋箱頭筆，仲有繩，即刻返火車站locker取回行李，將買番來所有野都放晒落個箱到，當然要砌得靚靚啦，如果唔係點放得晒喎，仲要有保護作用，慌死佢比人地撞爛呢．終於完成啦．即刻去郵局寄o左佢，用o左Yen3600幾，佢話大約十日寄到返香港喎．

行李輕晒，但係時間無多．我地好快又要趕去靜岡啦．到o左靜岡站起觀光案內所發現小丸子屋企，決定要去睇下，我地好好彩咁預到個好好人的姐姐，取地圖之後就即刻去搵酒店，起九十幾個出口的地下街近松板屋附近又預到另一個服務員主動咁走埋來幫我地，教我地轉去西武方向再上地面，好容易就搵到酒店啦，真係出路遇貴人．

因為我訂酒店個陣話呢間酒店對外國人唔好，所以我就由頭到尾都講日文，又冇咩問題喎，都幾好呀！我地check-in住226號扆，就馬上起程返靜岡站啦．先去新靜岡Centre，嘩！開心死啦！終於比我地換到十月份Point Gift草苺裙Kitty公仔啦，仲買到埋十月份孖公仔，之前去到邊都搵唔到，呢度真係咩都有齊，好開心喔！\(^_^)/

跟住我地就起靜岡站坐私鐵去清水站，再起清水站等巴士，等o左好耐好耐，終於我忍唔住問JR站長先知道原來我地去錯巴士站，應該起對面馬路個個先至係，好在架免費Shuttle Bus 成粒鐘先得一班車，所以我地都冇miss到班車．上o左巴士好快就到o左S-Pulse Plaza啦，三樓就係小丸子屋企啦，即刻用Yen300入場，咁平？入面唔係好大，但係如果你係鍾意小丸子的話，你就可以影幾筒菲林都唔夠，首先經過小丸子屋企，書房啦，客廳啦，廚房啦，課室啦，遊樂場啦，仲見到花倫同學起架名貴跑車度，真係好得意架．我仲坐起小丸子側邊同佢一齊上堂，好開心．

出來之後起商場入面行一圈，又幫三佬買o左幪面超人，真係唔好睇少靜岡呢個地方，起第二度搵唔到D野，起呢到全部搵齊晒．利害，利害．我地起清水站搭JR返靜岡，起靜岡站有一間葯房仲入關門，即刻飛奔入去買感冒葯比湯米，又起靜岡站睇野食睇o左好耐，終於決定去第二度食．在返酒店途中食o左意粉，又平D，又好味，又唔會太多，其實個人咁累都冇咩胃口，湯米又唔舒服，呢度食就最適合啦．之後返酒店沖涼洗頭就即刻上床休息啦．ZZZZzzzzzzz