到o左函館，天都未光，即刻起站頭同叮噹影番張相先．嘩！攪咩呀？咁早就有日本團集合，我地即刻問站長呵噹火車起邊度買飛，點知佢話今日係限期最後一天，D飛一早賣晒啦，好失望！冇得搭叮噹火車啦！原來係有預售票架，又蠢o左啦．

我地唯有出去行下函館朝市啦，人地都仲未開工，真陰公囉！我地行來行去行o左好多個圈，終於到清晨五點啦，我地跟番原定行程去個間最出名的飯堂食巴dong，好正呀！一個好感覺好日本o既日本碗裡面，整齊排列滿三種新鮮的日本魚生．嘩！帶子，海膽，魚子，又滿又新鮮，我成日起香港食日本野都從未見過一碗魚生飯可以比到我咁o既感覺．真係好實在，好滿足，係咪發夢呀？不過晨早留留就食飯好似怪怪地．

跟住又去o左海邊最督督個間最多人幫襯的食店食著名北海渡長腳蟹，
因為我地得兩個人，我地挑選o左一隻麻麻地大的新鮮長腳蟹，
老細將佢放係個大煲度煮熟佢比我地食，睇住佢整好o左熱哄哄咁拿過來
交比另一個同事，佢就將佢軟開擺靚靚然後就一大碟送到我地面前，
嘩！夢想成真！真係開心到好似發夢咁！起冰冷寒風下，我地坐係個
暖暖的食堂入面，面前放住一碟又新鮮，又香噴噴，又擺得好靚，
又大大隻，又熱哄哄的北海渡長腳蟹，好幸福呀！兩個人望住隻蟹
你一件我一件好快就全部食晒，真係好滿足喔！我地臨走仲同老板
個公仔影相，好想留底呢D美好o既回憶．我肯定第二時睇番都一定
會回味無窮．

兩個人肥o都o都肚滿腸肥咁步出食堂，又去乾貨市場行下，買o左兩條晒乾o左o既魚，好得人驚喔！不過我又想買返去比肥老豆同埋瘦媽做手信，咪唯有驚都買囉！不過全程沿路都見到好多又肥又大o既魚，
好得人驚架，不過感覺又好似冇香港見到個D咁驚，可能佢地都係一條條咁排起度，唔會好似香港街市見到o個D咁有時得個頭郁郁下，有時得番條尾都仲起度擺擺下，好嚇人架嘛！

因為冇得搭叮噹火車，我地決定早D去扎幌，搭o左三個鐘火車終於到步，即刻去酒店check-in，真係估唔到東橫Inn係咁好架，雖然我地太早未可以比房我地，但係佢地都主動提出話幫我地keep行李，等我地唔使帶住咁多行李週街走，真係多得佢啦！我地出發先去搵三間Kitty Shop，都冇咩特別喎！不過起丸井今井個間就好大，成層樓咁大架，仲有埋兒童樂園，又有Kitty火車，又真係好開心喎！

之後我地又行狸小路，時計台，大通公園等觀光名勝，影番D到此
一遊o既相交差．之後我地就返酒店取回行李入房啦．好好地休息
o左兩粒鐘，個肚古古聲，湯米唔知係咪太累，或係有少少病，
足足睡足粒鐘，我八點鐘叫醒佢，然後就去元祖拉麵橫町食晚飯．
我地搭地鐵去，起地鐵月台發現行車道好似香港咁中間有條軌，
不過奇就奇在架地鐵兩邊係行車呔架，又幾得意喎！我地先去
新拉麵橫町行一圈，一D都唔吸引，再行遠D去元祖拉麵橫町，
感覺好好多，試落仲真係好好味架！

食飽飽返酒店執行李，聽日去小樽啦．