朝早起東橫Inn食早餐，有牛角包，香蕉，味噌湯，咖啡茶，又唔使錢，又坐得安樂，仲有得上網，真係冇得彈，下次無論去日本邊度，東橫Inn都係首選．

食完早餐就起程去小樽，起南小樽站落車再步行去小樽站．途經好多舖頭同埋博物館，銀鐘樓，萬華鏡館，音樂盒館，北一哨子，小樽運河，我地起途中買o左好多紀念品同埋手信，我買o左一個音樂盒，薰衣草杯，湯米買o左一隻好得意o既擺尾狗仔，條尾擺得勁快架！沿途仲見到好多本地旅行團．

小樽比我o既感覺係好高尚，好有藝術氣色，無論係名勝，賣店，建築物都係好似藝術品咁，係一個非常值得去o既地方，我仲起小樽o既郵便局寄o左名信片返香港比GRB，係一隻好特別o既長腳蟹名信片黎架，好靚架！我又食o左薰衣草雪糕，都幾好味！返到小樽站之前，我地又經過鐵路遺跡，仲有D中學生起度影相，唔知係咪要做project呢？

我地要由小樽去札幌，個火車站鬼死咁大，幾乎搵唔番個locker起邊，好在最後都趕得切搵得番個locker，仲夠時間買兩個麵包上車食．起火車上面睡幾覺都仲未到，三個幾鐘真係番香港都得啦．一到札幌，就即刻起站內買o左十盒白之戀人朱古力，仲有五盒幫Mailing買o既粟米朱古力條，又問間舖頭要一個紙皮箱，起站內一個舒適o既樓梯位置將所有手信pack晒落去，然後就即刻去郵局寄o左佢，真係要多謝兩個學生妹帶路，如果唔係，真係都幾難搵到間郵局，咁又寄o左七千幾Yen，佢話大概一個星期就可以寄到香港喎！

我地再直行check-in Rick酒店，入住907號房，放好行李就即刻起程去函館山坐吊車上山頂．起酒店門口坐叮叮Yen200幾個站就到，但係落車之後要行上一條長命鈄就真係比埋條命佢咁，行到我死死下．好辛苦呀！終於捱到纜車站啦．買o左飛，又未夠鐘開車，再起小賣店度行o左一陣就去排隊，我地排第一，可以企到車廂裡面最佳位置．其實都冇咩特別，我覺得香港夜景仲靚啦．不過最特別就係函館個形狀好似南Y島咁，都幾得意．到o左山頂我地起賣店行o左一陣，都冇咩特別野，行出室外行下啦，嘩！好凍呀！又落雨，我地把遮竟然起一秒鐘之內吹爛o左，幾乎凍死啦．

我地終於都行到最高o既瞭望台，又凍又落雨，影完相
就快快趣趣走番入室內，我覺得自己已經凍到冇咩知覺，
之後就排隊坐番纜車落山．

我地步行去西波子場，湯米話呢個買手信最多最好，可惜
太夜啦，D舖頭九成都關晒門，我地行o左一陣，買o左小小
紀念品，就搵o左一間餐廳Bay食自助餐，每位Yen2500，都
算幾抵食啦．我第一時間飲o左個味噌湯暖番個身，跟住仲
食埋白飯，好好多啦．起呢度我地食到晒北海度著名o既
農產品，D薯仔好香味，蜜瓜就好甜好新鮮，真係唔同架，
總知就正啦．

食飽o左覺得個人好累，全身D肉都好痛，又覺得好凍，死啦，
可能係起函館山冷親o左啦，即刻食o左兩粒Panadol頂住先．
千祈唔好比自己病．好彩好快就有叮叮，返到酒店湯米較埋
熱水比我浸，馬上上床休息，個人先至暖番．