今朝好早就起身，因為尋晚唔舒服好早就上床，咩都冇執過，但係最後都係趕到死死下，好在酒店門口有叮叮去函館站，如果行出火車站就一定趕唔到班火車落青森，走o左班車又唔知要等幾耐，好在！

坐火車由函館落青森要經過一條世界最長o既海底隧道，架火車行得咁快都要足足行o左半個鐘先到本州，真係好長！一路上D風景都靚絕，無得彈，又雪山，又紅葉，仲係我呢一生第一次親到蘋果樹，原來真係一個個大蘋果吊住起棵樹上面，真係見到都覺得佢新鮮．可惜自己咁肚餓冇咩力氣．

到o左青森，決定起個站附近行下，不過實在係太肚餓啦，我地起站快餐店食o左雞扒包同埋魚柳包，估唔到咁好食．之後行下行下買o左個著名青森蘋果，仲揀o左個最大o既黎影相，個蘋果真係好香，我放好o左起個背包度，D香味一路咁傳出黎，好香好香．我地又去郵局買o左張名信片寄去湯米屋企叫佢地唔使擔心，點知個度D名信片係白雪雪咩公仔都冇架，寫好o左始終都係覺得佢白雪雪咪自己畫棵蘋果樹落去囉．之之再起青森站休息一陣，就上車去盛岡啦．

又坐o左兩個鐘車，個pad pad都扁埋啦．終於到o左盛岡站啦！

即刻去東橫Inn check-in，放好行李但係未入得房要等到下午四點，我地就四圍行下，行返車站觀光案內所取地圖，但係冇咩特別地方想，去o左地下街一間叫三龍亭中華料理食拉麵，麻婆豆腐套餐，二人share，好飽．返酒店休息一陣就再出發去花卷睇銀河鐵路壁畫．

到o左新花卷站見到站前的風車林，覺得好得意，但係起站附近就搵唔到
壁畫，起站左邊見到一間土產賣店仲未關門，入去睇下發現一隻肥嘟嘟
的白綿羊小擺設，好可愛喔！當然買o左啦．個店員仲話我地知去壁畫
o既方向同埋位置，我地出門口o左彎落斜路就即刻見到啦．不過沿途
經過一條橋，橋上面彫滿鹿舞公仔，都好恐怖架！不過幅銀河鐵路壁畫
又真係幾靚喎，四圍都好黑好黑伸手不見五指，幅畫由對面馬路投射過去，
每一部份都好清楚，仲好大幅，相機都冇辦法影得晒，都值係去一睇架，
不過，實在係太凍啦．

走個陣起火車站月台見到鹿舞站標，當然會同佢影番張相，不過真係有D驚，好恐怖架！