今日直接返上野，可以遲D起身，可能已經習慣o左住東橫Inn，一切都變得好熟識，已經知道起邊度會有D咩野，真係有份安全感．其實去長期旅行安全感真係好緊要．十幾日旅行，晚晚住o既地方都唔同，日日新鮮精神真係會好緊張，有時特然間醒o左要諗好耐先知自己起邊度，我試過有一晚醒o左諗o左好耐都唔係好肯定自己究竟人在何方，湯米都試過發開口夢睜大對眼大聲問＜呢度係邊度黎架？＞佢講呢句野個陣仲成個人企o左起身架，不過佢其實係睡眼中架喎，第二朝醒o左佢自己都唔知自己醒過，你話精神係咪好緊張，又好大壓力，所以如果可以起途中感到安全感真係好難得，亦都好寶貴．

我地起東橫Inn食早餐，有味噌汁，飯團同埋咖啡茶，不過就冇北海渡個度咁正啦．我記得個度有牛角包，仲有新鮮香蕉，感覺好好架．真係覺得東橫Inn好正，又平，房又大，床又大，D野又乾淨，又有得上網，仲有免費早餐，冇得頂，下次再黎日本，東橫Inn必為首選．

食飽返房取行李checkout，今日除o左兩件大行李，兩個背包，仲多o左一個雞雞袋，真係太多野啦，冇辦法放晒落個大行李度．好快就到上野啦，早到連D機舖都未開門，我地第一樣諗住要做o既就係執紙箱，盡量寄D野返香港嘛，唔係點拿咁多行李喎．我地去到日光館，搵唔到媽媽生，正係得個死蠢阿嬸起度由頭到尾問我地取鎖匙，撞鬼佢我地都未check-in，邊鬼度有鎖匙喎，真係比佢激死．我地唯有放埋D新行李入房仔就出去行街先，晏D返黎搵到媽媽生就冇問題．

我地先去池袋行o左三間Kitty Shop，又買o左好多野，仲用Yen5000買o左個大翠儀Kitty，好抵，跟住去新宿伊勢丹睇下地形，因為十一月二日山口裕子會起度有簽名會，剩係得十二點同埋兩點兩個時間，每段只簽三十個名．我地諗住個朝九點半就黎排隊，我真好想要佢個簽名，如果可以同佢影返張相就真係開心死，不枉此行啦！

返日光館即刻check-in，入住地下第一間房，貪佢近唔係搬行李咁辛苦，一入房就呯呯聲執野Pack野，要趕住包好D野去郵便局寄，驚佢關門嘛，原來平日呢間郵便局係關六點架，早知唔使趕得咁辛苦啦．又寄o左兩箱野啦，一箱Yen7000，一箱Yen4000，係就係貴o左D，但係唔使湯米同自己搬得咁辛苦嘛！

寄完野，我地又出發去秋葉原，可惜湯米始終都買唔到＜太鼓達人＞，邊有咁快賣晒架，好在佢都買到一D機，係佢心頭好黎架，最緊要開心啦！之後就再去涉谷，湯米永遠都以我為重，我地先行兩間Kitty Shop，再冇咩可以買啦，因為我真係買得太多啦，咩都買晒啦．湯米去Tower Record買CD，我就起McDonalds坐低休息下，真係好累喔！