 |
東京箱根溫泉五天團 (JNG5XP）
2004年4月25日~29日 領隊: Kelvin Ng 9639-7481/090-9969-9229 |
小肥肥一族(肥老豆，肥媽，肥妹，肥湯米)
| 第一天
香港∼東京∼新宿商店街∼歌舞伎町∼新宿太子酒店 |
|
| 第二天 河口湖香草園∼富士急動感樂園∼御殿場Outlet∼平和公園賞櫻花∼小涌園溫泉世界∼B&B Pension∼食超正魚生 |
|
| 第三天 淺草雷門仲世見通∼六本木Hills∼銀座∼池袋太陽城∼Tokyo Hands∼東京大飯店食神戶牛柳SabuSabu∼新宿華盛頓酒店 |
|
| 第四天 自由行∼都廳∼Sanrio Puroland∼池袋太陽城水族館∼御徒町上野∼台場一番街∼小香港∼大江戶溫泉物語∼新宿華盛頓酒店 |
|
| 第五天
新宿商店街∼東京∼香港 |
| 後記： | |
| 1. |
感覺上縱橫遊起日本的確有D地位，去日本跟團o既話跟縱橫遊應該係一個好選擇． |
| 2. |
領隊Kelvin其實可以有足夠時間帶團友去多D地方行下睇下，唔係剩係下下將D團友放低起新宿大街介紹兩句就解散． |
| 3. |
箱根小涌谷溫泉世界應該留多D時間比團友玩，等佢地有足夠時間去試水上樂園同埋森之湯，天黑先入場，我諗入場費會平D，不過真無可能夠時間玩，浸溫泉係享受，唔應該趕頭趕命． |
| 4. | 如果100分滿分，呢個團最多65分，因為好多山手線圈內o既景點都無去到，唔係遠，又唔係唔夠時間喎．何苦餐餐都係新宿，新宿，同埋新宿呢？ |
| 5. |
領隊Kelvin起最後一程推介兩個團比大家參考，一個係由北海渡一路玩到落東京o既豪華團，要兩萬幾蚊．另一個係絲綢之路十六天火車團，又係豪華團，佢話呢個係其他所有旅行社都做唔到o既就係包火車，剩係載自己一團玩足全程，一隊整齊人馬（包括廚師）全程跟足，包你玩得舒適過癮咁話喎． |
| 6. | 小耳朵聽完只係覺得要再努力D搵錢，因為我肯定肥老豆好想去．如果要去，小耳朵希望佢可以參加最好o既團去享受下．兩老年紀唔少啦，真係應該把握時間盡量去多D地方盡情咁玩下，享受下．小耳朵，努力呀！ |
|
希望肥老豆會鍾意呢份生日禮物，謹代表一家大細祝肥老豆生日快樂，身體健康！ 出發前一晚一家大細來晒小耳朵屋企幫肥老豆預祝生日，小朋友當然最享受打機啦，二佬同三佬就各自欣賞小耳朵大夢想閣的藏品，主角肥老豆同埋肥媽就執齊行李過來，聽朝一齊起呢度出發．夜晚一行十三人去對面間三悅飯店食餐勁o既，之後當然唔少得切蛋糕啦． |
 |
朝早七點約好Swire Travel專車接送往機場，專業即係專業，服務好，話咁快就到，司機仲好有禮貌，小耳朵要比個１００分來表楊下佢先得．集合時間係早上八點十分，我地小肥肥一族當然唔會遲到．見到部份團友已經到o左，見到領隊啦，佢話佢叫到Kelvin，叫我地比晒D passport佢check-in喎！咁我地就拿拿林比晒D passport同埋寄倉行李佢攪掂，然後就舒舒服服咁去美心嘆茶啦．
 |
f | 夠鐘過海關入閘啦，一切都好順利，我地呢個鴨仔團除o左有我地四個小肥肥一族之外，仲有三對小情侶，四個姐組仔，同埋大家族七人組，一共廿一人．港龍最近先加開新線飛東京，我地有幸試下，坐o既係KA360，十點兩個字起飛，到o左日本個天都仲光，值得一提的是呢一次個飛機餐真係幾好味，有豬扒飯，冷麵，熱辣辣麵包，仲有Haagen-Dazs雪糕，唔錯！ |
| 到o左日本成田機場，等o左一陣就有縱橫遊專車接送到新宿太子酒店check-in，領隊兼導遊Kelvin話縱橫遊起日本一共有四部旅遊巴，每次都會用盡資源，即係話架車會用到盡，今日係呢架，聽日可能第二架，而家接我地，一陣可能接第二團．佢仲話縱橫遊主理日本團廿多年，已經可以做到出神入化喎！小耳朵真係感受到而家呢個時勢辦旅行團的壓力，好似我地咁，無端端有兩日會同四天團夾團，兩團領隊一齊帶，跟住佢地又走o左． |
 |
Kelvin先起新宿大街Citibank門口簡單介紹附近熱點，好似Isetan，錶舖，博多天神拉麵，百果園，0101City，百貨公司等等．然後解散自由活動，我地起歌舞伎町一帶行o左一陣，無咩好做就番酒店等食飯，第一餐係起酒店食o既自助餐，雖然唔係好好味，不過OK啦，起碼都叫做有任食長腳蟹嘛！
第二天 河口湖香草園∼富士急動感樂園∼御殿場Outlet∼平和公園賞櫻∼小涌園溫泉世界∼B&B Pension∼食魚生
 |
ig | 朝早起身就去番尋晚食晚飯個間餐廳食自助早餐，肥老豆攞o左一大碟，攞埋我個份喎，小湯米又攞多一碟，又係攞埋我個份囉，咁多點食好呢！唔好理咁多啦，開動啦！食飽就出發去富士五湖的河口湖，我地起香草園停留o左一陣，因為今日同四天團夾團，我地本來無呢個行程，因為佢地有，所以我地就加o左呢個行程啦，小耳朵起呢度都買到小小野，可以薰衣草眼罩比Karen咁啦．跟住就去富士急動感樂園，因為考慮到肥老豆同埋肥媽都唔玩得刺激的機動遊戲，小耳朵唔知做咩咁大膽去玩鬼屋．最後一行四人嚇到傻晒咁行番出來，小耳朵雙臂仲比肥媽搾到瘀埋，真慘！ |
|
跟住四圍影吓相，又趕住時間集合，小湯米自己去睇高達館，小耳朵同肥老豆肥媽就先去開飯，我地張午餐券可以選擇食西式意粉或者日式拉麵炒飯套餐，終於起餐廳低層o左拉麵，食飽飽仲有時間起賣店買限定版Kitty，再上車啱啱好．下一站係御殿場Outlet，估唔到我地起呢度都買到D野喎，主要係衫啦，肥媽話佢帶唔夠衫，咪起度買o左件長袖衫比佢，又買o左一件比肥老豆，兩件T-shirt比小湯米，一件靚衫仔比契女，一包得意小襪仔小吉女，同埋一件T-Shirt比自己，全部一tick過起Nike度買o既．兜o左一個大圈行番出停車場，好攰喎！
|
 |
跟住去邊度？咪係去好中國feel o既平和公園囉！落車後領隊首先介紹自動販賣機 o既粟米湯，佢話一定要試下唔好錯過喎，跟住就向上行，斜路兩六旁有好靚石燈，上到中間左面有一個大鐘，Kelvin話一到日本新年十二月三十一日（即係日本人年三十晚），佢地就會搞鐘一百零八下喎，再上呢左面有一個水池比人飲水同埋洗手，右面有一個許願鐘，直行到尾係白塔，入面封住粒舍利子o架喎！路兩面就擺放住各國贈送一對對獅子（香港個對排第一，都幾靚．）
 |
a | 沿路仲見到有櫻花，好興奮喔！終於比我親眼見到日本櫻花啦，不過盛放期已經過完，而家係落櫻尾期啦，好在仲有幾棵仲好靚比我地影相，回程起日本花園外影o左大草鞋就要走啦．臨尾梗係買番罐熱辣辣粟米湯試下啦，又真係幾好味喎！ |
|
一車直到小涌園B&B Pension先check-in，呢度真過癮，唔理你係咪情侶朋友親人，總之一人一間房，仲無電梯要行樓梯，樓高五層，好彩我地分配到三樓唔使行咁高．．．索晒氣．
|
 |
|
 |
上房換好衫就起程行去小涌園溫泉世界啦，唔係好遠，五至十分鐘就到，可惜無帶相機，入面都好靚下喎！我地趕入場希望可以有咁耐玩咁耐囉．入面有大池啦，羅馬池，按摩池，死海鹽湖池，Sauna，滑水梯，室外室內，真係好多個各有特色，見住肥老豆同埋肥媽走上走落不知幾咁開心，肥老豆比較愛Sauna，肥媽就偏愛死海鹽湖池，佢地咁開心，真係咩都低啦．可惜時間有限，小耳朵都無緣試下對面個＜森之湯＞，個度先至係日本正統溫泉，木桶個隻呢，不知幾好feel，下次有機會一定再來過．
|
 |
a |
之後去賣店買野，再order Pizza同埋意粉，加埋預定超正魚生，就成為今夜豪情晚餐啦，真係好好味，不過好快飽，想食多D都食唔落啦．一萬Yen一碟魚生，訂兩碟，一餐就千幾二千蚊港幣，你話豪唔豪？ 美中不足係個警鐘誤鳴兩次，第一次攪到個個伸個頭出來望望下，因為唔知發生咩事，原來有人按錯鐘喎，第二次仲激死，半夜先來嚮，嘈醒晒D人，又要誤鳴，呢方面似乎有待改善啦． |
第三天 淺草雷門仲世見通∼六本木Hills∼銀座∼池袋太陽城∼Tokyo Hands∼東京大飯店食神戶牛柳SabuSabu∼新宿華盛頓酒店
|
朝早起渡假村地下一個小小飯堂食歐陸式早餐，咩叫歐陸式早餐呢，咪就係只係得飲品（咖啡同水）同埋麵包囉！好在D麵包好新鮮，都幾好味，起樓上未行落來都索到佢地D麵包好鬼香啦．食飽飽又係等車o既時候啦．今日四天團去迪士尼，我地五天團就番東京市內玩，所以D行李都要分得清清楚楚咁擺好，如果唔係佢地走人攞錯咁就敝啦． 今日天氣好差，又大風又大雨，好似香港打風咁，真係可憐佢地四天團今日要去迪士尼樂園，個度近海，又空曠，容咩易吹到病喎！係就係少D人排隊，不過你自己都無心情玩啦，仲話要起入面留足一日喎，攞命囉！ |
a |  |
|
|
a |
我地五天團就先去淺草雷門寺，因為要就巴士停車，我地起側門入，先見到雷門寺，再行番過去仲世見通，小耳朵發現原來肥媽唔係係神都拜o架喎！之前係平和公司有舍利子佢又無點拜，而家起雷門寺都無拜喎，佢話許o左願，第二時如果願望達成要還神喎！我地一直行落仲世見通，肥老豆同埋肥媽呢兩日都無咩買過野，比零用錢佢地都唔知做咩，於是最權威o既小耳朵下令兩人在行完呢條仲世見通之前每人最少要買到五樣野，一聲令下，肥老豆同埋肥媽就變得積極D去搵手信買啦，咁先乖啦． 跟住又車o左我地去六本木，小耳朵來日本咁多次都從未踏足六本木，本來有些少好奇想知道呢個係點樣o既地方，最後我只係發現一樣野，就要呢個地方唔係小耳朵呢種人來o既地方，呢個其實係一個名店區，最新最靚最top，當然最貴啦，集合地點對面就係朝日電視台，小湯米襯集合前數分鐘走o左過去望下，佢話個度有隻大叮噹喎！好辛苦咁終於等到夠鐘集合啦．下一站係銀座區 |
|
我地行去博品館，幫三佬買齊十二隻新出超星神軟膠人偶，仲買埋個公仔架送比佢，今次實開心死佢啦．又去埋有樂町，仲起個度換埋Hello Kitty Land入場券四張，慳番一畢． 四人同行去食中國料理，肥老豆且埋肥媽幾日無米落肚都應該唔多習慣啦，肥媽即刻整番個菜遠肉片飯，肥老豆就食湯麵，之後小湯米仲起Big Camera買o左D心頭好，佢話有o左呢樣野，小耳朵大夢想閣網吧就可以四手掣一齊打喎，勁呀！又到o左集合時間，一車車番新宿大街又放低晒D人，一個五日團時間已經唔多，係咪應該盡量比D團友去多D地方行下呢，就算要shopping，都仲有好多地方可以去喎，次次都起新宿大街放低我地，真係有D悶啦 四人同行決定用呢個自由時間去池袋，可惜趕唔切去水族館，因為收六點，都行o左Sanrio Ya，Tokyo Hands咁囉，都叫做去D個團唔帶人去o既地方啦．行完好攰啦就番新宿東京大飯店個座大樓六樓食Sabu Sabu自助餐．Kelvin話呢度廚房有香港師父，唔怪得D食物口味咁似香港啦． |
a |
|
 |
a |
今晚又要豪一豪啦，我地訂o左兩塊A級神戶牛柳呀！一萬Yen得一塊，兩塊就已經千四蚊港紙，好貴喔！小耳朵都有D肉痛，不過既然係同肥老豆同肥媽來玩，人一世物一世，咩都要比佢地試下啦，最緊要佢地開心就係我今次來日本o既目的啦． 呢D神戶牛又真係<神仙放屁，不同凡響>喎！佢個賣相已經好靚，紅白有序，無論你煮到佢幾熟都好鬆軟，入口溶化，又真係唔同D喎．Kelvin話做牛好過做人喎，點解，因為佢地有專人服待，食最好飼料，飲富士山泉水，經常聽住輕音樂，仲要適量運動好似游水咁喎，真串！低佢比人一啖食落肚，咁嘆呀啦！ |
第四天 自由行∼都廳∼Sanrio Puroland∼池袋太陽城水族館∼御徒町上野∼台場一番街∼小香港∼大江戶溫泉物語∼新宿華盛頓酒店
今日班團友全日入迪士尼樂園，佢地兩個又唔玩機動遊戲，又唔鍾意米奇老鼠，要佢地起迪士尼坐一日，不如小耳朵同埋小湯米同佢地四圍去睇下仲好，為o左唔想肥老豆同埋肥媽兩老起入面悶到傻，所以報名時已經決定今日四人同行自由行．
 |
a |
先起酒店25樓食自助早餐，然後行過去新宿站，途經東京都廳仲可以影下相，第一站係 Sanrio Puroland (Hello Kitty Land)，肥老豆同埋肥媽終於可以親身體會到點解小耳朵會咁鍾意呢個地方，因為呢度每樣野都係正面o既，好純真，好舒服，又唔使用腦，可以舒緩神經，比自己休息下． 小耳朵仲帶佢兩老去坐船仔，起入面見到o既全部都係D做得好靚o既公仔，好似去o左另一個世界咁，我諗我都幫佢地從獲不少童真o架！又估唔到肥老豆同埋肥媽同D卡通人物影相會笑得咁開心喎，咁咪好囉！小耳朵去咁多次都未試過Hello Kitty會主動來同你影相，今次可能因為早入場啦，又平日比較少人，真係任影唔嬲． |
 |
a |
因為今日安排o左好多節目，小耳朵起賣店買o左D野就走人啦．唔緊要啦，食飽個肚再行過．就番兩位老人家，我地呢一餐都係食中華料理． 尋晚趕唔到入場，今日再去過池袋水族館，肥老豆鍾意睇魚嘛！見到佢地兩個睇得咁開心就咩都低番啦，可惜呢個水族館唔係好大，可以睇o既野都有限． 下一個站就係御徒町同埋上野，我相信佢地兩個一定最鍾意行呢度，因為呢度D野又平又多又啱佢地買，肥老豆先買兩支保濕乳液（做手信喎！）肥媽唔執輸買番樽美白，日本名牌Kose來o架！跟住．．．來料啦．．．二目之菓子呀！肥老豆同肥媽一人一個籃先上二樓掃貨，再返地下再掃，見到佢地兩個買得都不知幾開心，又呢樣又個樣，呢D先係佢地想行o既地方呀嘛！一輪衝風一人兩大包行番出來，滿載而歸！爽呀！ |
| 我地再去新橋站，先將D野攞晒起locker，再搭無人駕駛火車入台場，先行台場一番街，再行小香港，小耳朵亦順路行埋Sanrio 屋，有少少收獲啦．今日戲肉來啦．就係台場大江戶溫泉物語啦．之前Kelvin帶我地去過箱根小涌谷溫泉世界，不過個度其實似個水上樂園多D，唔似日本人正式個隻溫泉喎．呢度係要剝江豬咁浸o架，咁先體會到日本人o既習俗嘛！ | a |  |
 |
佢地自己選擇自己鍾意個件浴衣同埋腰帶，換好衫咁走出來，都幾好玩o架！最初肥媽都怕醜剩係肯浸足浴，後來聽我地講下講下先肯試下，佢都浸得幾舒服呀．咁大個女都係第一次同肥媽兩個肉帛相見，不過小耳朵又覺得母女感情更進一步喎，可惜陪唔到肥老豆啦，唯有將佢交托比小湯米啦．浸完又睇表演，食o左墨魚燒就走啦． 因為小湯米仲要趕住去買唱片，佢咁多日都無咩機會去睇唱片，一定忍得好辛苦啦．小耳朵仲辛苦呀，本來今次諗住跟團所以完全無帶個腦出街，亦無刻意咁認路，小湯米忽然間因為要及買唱片而趕唔切帶我地行番酒店，要小耳朵獨力帶肥老豆同埋肥媽先去食大會指定推介九州博多天神拉麵，再步行返離火車有十五分鐘路程o既酒店．．．．有D緊張，不過好在都無另各位失望，無行寃枉路都去到食拉麵同埋返酒店，兩位老人家玩足一日已經攰到死，小耳朵點忍心要佢地多行一步寃枉路呢！（話時話個天神拉麵豬骨湯底又真係幾正喎！就起歌舞伎町一番街中間，有機會大家都可以去試下喎！唔貴o架，500Yen一碗．） |
 |
|
返到酒店仲買埋Kitty果汁，Little Twin Stars果汁比大佬個女，同埋時刻表比二佬，自由行一日中大成功，返到上房電話即刻響，原來Kelvin話我地訂D手信已經執好，可以去佢個房攞喎．咪拿拿林去攞返來，等肥老豆同肥媽安心收好D手信囉． 小湯米好夜先返到，佢話都唔係好夠時間喎，仲晚飯都未食，返到來又唔知自己住邊間房，又要返落樓下問，又攰到死，好可憐喔．好在小耳朵一早雪定D士多啤梨比佢食，不過買到自己心頭好就咩都低番晒啦． |
a |  |
最後一日啦，我地會坐KA361，下午三點幾機返香港，即係要起一點半左右到機場，又即係要十二點半上巴士起程．D舖頭又無咁早開門，唯有好晏先morning call，食完早餐仲返房瞓一陣先夠鐘出門口，去邊度？又係新宿大街，終於成班團友都唔肯解散企晒起度，Kelvin就帶大家去行Times Square，小湯米去睇唱片，小耳朵就帶住肥老豆同埋肥媽行下玩具部，文具部，佢地兩個都買o左少少野，然後就起地下案內隔離坐下休息下，小湯米同小耳朵就起Tokyo Hands買o左飯殼同埋日本酒比小湯米父母，然後又夠鐘啦．我地又返到歌舞技町一番街街頭集合，小湯米把握最後一分鐘標去買o左個<爽>番來比小耳朵食，小耳朵起巴士上食住爽，完成呢次肥老豆生日東京箱根溫泉五天團，真係覺得好溫馨喔．
希望肥老豆同埋肥媽都覺得呢次係一個好玩o既旅程就好啦．祝你地兩個身體健康，下次小耳朵再帶你地去第二度玩啦喎！