Day 1 - 2月3日(星期四）

等o左咁耐，又用o左咁多時間籌備o既＜北海道雪祭冰封十日之旅＞終於成行啦！大清早四點幾就起身，快快趣趣刷牙洗面，出門口搭機場巴士，頭班車清晨五點三起北角開出，去到機場時間剛剛好，馬上check-in，兩個大背囊即場放入紅白藍，嘩！唔係啩！20Kg？再加埋個大喼，18Kg，坐 Northwest 每人只可以帶20Kg 行李寄倉，咁咪即係叫我地唔好再買野放落去？無計啦，因為今次係去低溫體驗，又雪褸，又雪褲，又頸巾手套羊毛襪 Superwarm，樣樣野都又大又重，最重就係D暖包，總之，小耳朵去o左咁多次日本都未試過一次係出發時o既行李都咁重o架啦．
 
架機 overbooked 得好緊要，個 counter 姐姐竟然夠膽同我講可能安排我地轉坐第二班機，佢真係無有識死，唔知小耳朵係咩人，我咁早起身趴到來機場，你同我講D咁o既野？佢講完呢一句，我就即刻用一個想殺死佢o既眼神，好有禮貌咁極速講番三十句要佢諗都唔好諗o既理由過佢聽，佢即時收聲之餘，仲起三十秒內check-in 完成，咁我地就去食早餐啦．小耳朵話晒以前都起機場做過幾年行政，要講D富麗堂皇o既理由要佢收聲真係無難度，不過個姐姐個樣就好明顯要去喊驚咁囉！
 

到o左成田機場見到派晒長龍，小耳朵去日本咁多次，最多人過海關都算係今次囉．等o左成半粒鐘終於排到啦，提提大家喎，而家o個張日本入境form要填埋後面喎，上次四月去都唔使，今次就多o左D野起背面．我地起二號行李帶攞番行李就先去出JR Pass．

JR個姐姐真係懶到死，等我仲咁好心機一早整好張車班次表，等佢跟住個 list 唔使搵都好快出到，點知佢懶到剩係幫我出頭兩張，就話後面有人排隊唔幫我出，有無攪錯，隔離個姐姐咪又係一次過幫人出晒D飛，唔好話佢懶，係面有人排隊，得一個人點排隊呀？不過小耳朵係來玩o既，費事同佢理論，不如快D去東京仲好啦．

下一班Skyliner要成粒鐘之後先開，我地決定搭2:44pm京成電鉄去上野，仲好，每位Yen1000 慳番筆．架車開晒暖氣，好焗好熱，去到東京都唔覺得好涷．
 
去到日光館，媽媽生起counter 度等緊我，一見到我，佢就連小耳朵個名都講得出，真係好溫暖喔！試問去旅行邊間酒店會記得你，呢個亦都係小耳朵鍾情日光館o既原因之一，當然，＜平＞亦都係一個主要原因，快快趣比o左三晚房租 Yen18,000 就放好行李入103號房，一個箭步就去玩啦．小耳朵一句＜行きます。＞媽媽生一句＜行ってらしゃい。＞　真係好好feel．
 

我地先去亞麵坊醫肚，然後就起上野駅出埋D飛，呢個counter真係唔同，D人又醒目，做野又快D，應該擺拒起機場幫D遊客，等人地一來到日本就有個好印象啦．

出發前諗住來到日本先買對厚D o既鞋，因為呢邊會多款D，又靚D，去0101又買唔到，見佢裝修緊都無咩心機行，咪行下上野街市，松板屋，吉池，都係搵唔到特別鍾意o既，咪搭車去池袋囉，行Vivitix，Gift Gate，Tokyo Hands，不過就趕唔切，白白睇住Saniro Ya落閘入唔到，之後再掃埋HMV，最後返上野松屋食飯，又快又平又方便嘛，小湯米仲發現佢隔離開多o左間光麵，好野，以後又多個選擇．
 
夜晚涷o左好多喎！