Day 3 - 2月5日(星期六）

小耳朵一向都好醒瞓，凌晨四點幾，我覺得架車停o左成十分鐘，咪起身望下出面情況囉．原來係停駅．嘩！一遍白濛濛，冰天雪地，我靚呀！，好想影低佢，咪即刻快快趣趣走番上床攞相機，再標去列車門口影番兩張留念囉．好險！影完相佢即刻開車喎！好在上番車，如果唔係，小耳朵剩係得件Superwarm，一條普通長褲同埋一個相機，又無褸，又無証件，又無錢，又無人知我落o左車，凌晨四點幾一個人流落起呢個唔知咩駅度就慘囉！而家諗起都好險！
無事無事！上番車再瞓過，差唔多仲有三十分就到登別，車長好細心咁逐格叫人起身，小耳朵一早醒o左，已經梳洗完，咪叫小湯米起身囉．冰天雪地，真係著衫都要多D時間o架．呢個時候，小耳朵就開始享受我個限定版Hello Kitty便當啦，食飽飽仲可以留番個盒來收藏，真係好低！
     

點解無人落車o既？好似得我地兩個落車咁喎！可能個個人o既目的地都係札榥啦．唔理咁多啦，照出閘．嘩！發達啦，咁啱即刻有巴士喎，梗係標上車啦．點知∼∼唉吔！唔記得放行李入locker喎！

好在到o左登別溫泉街巴士總站都有locker，唔係就陰公囉，咩住個大背囊行地獄谷∼真係唔慌唔地獄啦．無事無事，又過一關！

起程沿溫泉街直行去地獄谷．一路落住雪，地面好滑，但係風景真係好靚，上山o既時候已經開始驚一陣落山點算，地面o個D都涷到唔係雪，而係冰，咪好滑囉！
     
我地行到一個木亭，對面係瞭望台，梗係唔少得要影番張相啦，我地仲起木亭前創造o左我地人生中第一個雪人，個樣雖然怪怪地，不過一睇就知佢係一個開心o既雪人，仲會為下一個遊人帶來一點歡樂．老實講，小耳朵真係有D唔捨得佢，如果帶得佢走，我一定帶埋佢番香港．Bye-bye啦！保重呀！
 一如所料，落山時真係好困難，向下斜的冰雪路好滑，每一步都行得好小心，一個唔覺意就會變o左滾地胡蘆，小湯米拖住小耳朵，一步一步慢慢行，終於都返到山腳啦．鬆一口氣，個人就覺得好攰，因為真係用多o左好多力氣行呢一段路．
 
沿路行去閻皇廟，可惜佢表演變面時間剛剛過o左，無理由企起度等幾粒鐘睇佢下一輪變面o架，不如快D去熊牧場仲好啦．
 
去到熊牧場吊車站入口，見到有吊椅上吊車站，每位Yen200，雖然坐上去三十秒就到吊車站，不過好似幾妤玩，咪試下囉．點知個駅長叫我地行上吊車駅買飛，再行番落o黎搭上去喎，佢係咪有病，我地行o左上去就搭吊車上熊牧場啦，仲點會比Yen200，然後又行番落來，再搭番上去吊車駅喎！佢唔執笠都係一個奇蹟！
 

熊牧場入場券連來回吊車Yen 2520，我地預先起internet印定discount coupon，每人Yen 2,350，慳得一D得一D嘛！又估佢唔到架吊車咁新喎！因為唔多人，我地兩個人坐一架吊車上山啦．小湯米一向都有愄高，所以有D緊張，無計啦，來熊牧場唯一途徑就係坐吊車，唔搭就去唔到．小耳朵就覺得好好玩咁就到o左山頂啦．
     

熊牧場入面唔係好大，門口對正係一個好大o既熊雪像，仲有滑梯o架！我地向右面行，用o左Yen100買麵包粒喟大熊．見到啦，見到啦，佢真係好大隻，我諗佢一定高過度門，又肥又大，不過身為大灰熊，個樣應該好凶猛先啱，意外地佢地竟然企起身，搖下搖下，擧起右手同我地揮手，然後再用自己隻右手指住個口，叫我地比野佢食．．．．點解咁o架，話晒都身為大灰熊，咁無專嚴，真係有D失禮．為o左保存佢呢一份專嚴，我比o左好多粒麵包佢食∼∼

喟完大熊就去睇熊展館，見到一隻隻高大威猛o既大熊標本，就覺得人真係好利害，咁大隻咁凶猛o既大灰熊都比人攪掂，好命o既到最後仲可以全隻企起度做標本，唔好命o既就比人分屍，連毛皮呀，瓜呀都唔放過．仍然生存o既就要向人搖頭擺尾攞野食，人類絕對係地球上o既強者，不過，小耳朵身為人類都有D唔好意思．

我地決定食野先，咪去o左地下食堂食麵囉，有電視睇，仲有假熊大樂隊奏樂表演，都幾開心．食完野，再將剩番D蘋果喟埋大熊，就去睇熊表演，全場只係得一隻小熊表演，睇落去好瘦，表樣花款唔多，碌下波，攞下數目字盒，同觀眾打招呼，Bye-Bye咁囉．小耳朵就覺得有D悶啦．之後就坐番吊車落車啦．本來諗住連續兩晚夜車無得沖涼，不如起登別溫泉街浸個溫泉浴先走，但時時間唔多唔足夠好好享受，小耳朵最後選擇唔浸溫泉，改去登別駅附近o既水族館．入場費都幾貴，要Yen 2300，不過見佢個外型好似唔錯咪入去睇下囉．

入面好大，都算好多野睇，不過小耳朵就真係唔鍾意佢內部o既建築設計啦，一條圓型樓梯係咁轉係咁轉，又長又暗兩邊牆又無野睇，真係轉到你頭都暈．好似我地咁，入o左去一陣又想趕返出來廣場睇海獅表演，就要轉到暈佗佗先出返來，好在個表演真係好精彩，低番晒．

不過睇完表演，又要走番入去再轉過睇埋未睇個D野，真係又暈過，真攞命囉！不過再一次睇到北海道獨有河仙就算數啦！

時間早o左D，我地梗係搭早一班車去札幌啦，話晒個度都多D野行嘛！我地快快趣趣去出飛，點知個駅長就起度數銀紙，小耳朵本來都由得佢，但係睇住塊牌架車仲有幾分鐘就來，終於忍唔住同佢講早いでください。時間が無いですから。佢終於都望下我啦，我即刻話佢知我地要搭邊班車，就快開啦，真係激死我，佢仲慢條斯理話時間んが大丈夫．跟住就放低疊銀紙幫我地出飛．我豈有此理，時間無問題你唔數埋疊錢先，仲咩拿拿林放低疊錢即刻出飛比我地啫，其實佢仲驚過我地，如果我真係因為佢慢吞吞走o左班車，我肯定剷到佢阿媽都唔認得，呢次算佢好彩啦．咁鍾意數錢，低佢成世剩係坐起個counter裡面數錢數飽佢．
     

到o左札榥先去觀光案內所攞地圖，襯天未黑四圍行，原定唔係今日睇札榥雪祭嘛，我地當然去偷睇啦，仲發現Hello Kitty雪像，即刻鎖定方位，到時要影副靚相，之後仲去埋丸井今井百貨11樓睇有咩Kitty買，再食埋牛扒，好好味，不過就好貴啦．兜完一個圈就回程返札幌駅等上夜車去釧路．沿路上都落住大雪，小耳朵真係從來無諗過札幌咁大o既城市D大馬路會有咁厚積雪，D車又多，咪好危險囉！

行到攰到死四圍搵個好位休息下，終於坐o左起商場內雪人前面一個唔錯o既位置，有電視睇，又有雪人睇，小湯米就一個人再去行，不過D舖頭都收得七七八八，小湯米好快就返番o黎．
     

我地改入札幌駅內搵位坐，不過四圍都好涷，好唔容易搵到JR 綠色窗有兩個位，又有暖氣，不過就對正出飛個兩個職員，我地又唔係出飛，入面又無其他人出飛，攪到我地坐一陣就唔好意思，終於去o左Starbucks 叫o左杯熱朱古力飲坐到夠本，不過都只係捱到十點半佢地就關門，本來坐滿人客o既Starbucks竟然起三十秒內清場，D日本人真係好聽話，換轉起香港，起碼可以捱多十五分鐘先真係起身走人啦．無計啦，咪去駅入面攞番D行李，小耳朵無沖涼覺得好唔舒服，終於就咁起駅內D長椅上換過對長襪，當堂舒服晒．最後我地都搵到個有暖爐o既位置坐低等車．個人暖番晒囉．

兩日無沖涼o既小耳朵覺得周身唔自在，一上到車搵到張床就即刻將身上除得o既野都除晒，唔理有無人睇到除剩件Superwarm同埋虧佬褲就去刷牙洗面，仲沬埋身，返番床就即刻舖床，然後走入去拉埋布簾換晒全部衫，舒服晒．隔離床個男人唔瞓起度飲啤酒我都唔理咁多啦，攰到死一於大覺瞓．今次小耳朵瞓下格床，小湯米瞓我上格，小耳朵始終都係鍾意下格床多D，話晒對腳都掂到地安全D嘛！まりも號比我唯一 o既印象就係∼∼好好瞓！