Day 4 - 2月6日(星期日）

清晨六點到o左釧路，都係先將行李放入locker，然後就行去弊舞橋，途中見到釧路雪祭，屬小型雪祭，只係一個普通公園咁大，大概有十個雪像．一場來到，都係影返幾張靚相先，因為係清晨六點，四圍都無人，我地仲可以走埋上雪像台摸住個雪像影相．晏D有人睇住就一定唔可以．行完小釧路雪祭，就過對面便利店買o左個肉包食，好快就行到河邊見到弊舞橋啦．有一隻小狗好似好開心咁走過來聞下小湯米，跟住又跳過來小耳朵度，真係好開心咁喎！
   

時間實在係太早啦，Moo梗係未開啦，就連旁邊個植物園都未開呀，其實成條街個無一間舖頭開，只係得幾個人帶埋小狗起度晨運，我地就起河邊坐一陣休息，本來想去食個早餐，但係因為間間都要十點先開，我地決定快步返車駅搭第一班巴士去阿寒，無理由起度等幾粒鐘等佢開門o架！回程時見到一個單身女子好似我地咁好無聊咁影相．

小湯米同小耳朵真係最佳拍檔，點解？因為班巴士就來開啦，大家都知道日本D車好鬼準時o架啦．睇住個錶仲有兩分鐘架巴士就開啦，我地剛剛先行到車駅，又未買飛，又未攞番行李．
     

小耳朵就馬上標入巴士駅買飛，再話埋比司機叔叔知小湯米入o左火車駅locker攞行李，請佢等埋佢先開車，因為架巴士唔多人，應該唔夠十個，司機叔叔又好人話無問題，小耳朵就企起巴士入口樓梯位置唔上唔落，一來肯定架巴士開唔到，二來要等小湯米一跑出來就見到小耳朵，知道係呢一架巴士唔使走錯路．終於∼攪掂！我地其實係趕得切準時上到車，架車係無因為我地兩個而遲到o架！

點知，剛剛起橋上見到o個個單身女子就起呢個時候出現，佢上車問巴士司機架車係咪去阿寒，當然又未買飛啦．司機叔叔見佢個樣咁無知，好人到落車帶佢入埋去駅內買飛，梗係又等埋佢先開車啦．

沿路停站時都仲有人上車，其中有四個台灣女仔，又係好蠢個D樣囉，齊齊企起度等巴士 ，架巴士唔來都唔去買飛個D人囉．我地架巴士埋站，佢地先走上來問係咪要買飛，咁妳地起個站度等咁耐，做咩唔問下個駅長喎！攪到我地成車人又要等呢四個女仔慢慢入站買飛．

仲唔止喎！佢地行李又多，巴士較前位置已經比人o左坐，不過後面大擺位，妳地咪去後面坐飽佢囉，其中一個四眼妹好意思到大大喼行李塞o左起小湯米隻腳側邊，仲想將另一件仲大Do既塞係小耳朵腳邊喎．咁大件真係傻o既都知塞唔落啦，我明知佢無可能塞得落，咪特登讓開比佢塞，等佢塞來塞去都塞唔落，成車人等佢僈慢塞個陣，成車人包括埋好心司機都頂佢唔順超住佢囉．結果∼咪就係無可能塞得入然後拉埋去後面陪佢坐囉．D人都唔知點解咁自私o既，後面大擺位，二十個喼都放得落啦，係要明知塞唔落都要塞住人地，佢究竟有無諗過人地o既感受？真係好乞人憎．我都係來玩o架！無理由比你咁樣影響o左我愉快心情嘛！所有大家記住去日本旅行，一定要做個有禮日遊人！
好在沿路D風景好靚，心情先好番．去到阿寒，嘩！好靚喔！好厚o既積雪喔！到大脾o架！我地兩個咩住背囊開始行去搵預定妤o既鶴雅溫泉酒店啦．先過對面Lawson買o左三隻蕉等一陣食．沿路D舖頭都無開喎！ 行到酒店．嘩！閒閒地都有成五十人起個大堂度，人生人海，個Reception Counter忙到發癲咁，小耳朵唔理三七廿一都要放低行李先啦，我都知未夠鐘攞房，但係放低行李我地咪可以四圍去嘛！

我地起程去玩囉！先行到酒店側有條小路通往白雪雪o既阿寒湖喎，我地梗係走出去望o下啦，好厚積雪，好白，好軟，好似踏在一片奶粉地上一樣，小湯米仲起呢度留印記∼∼咪就係成件趴起雪地上，以身體親吻雪地囉．好 enjoy 咁喎！

我地一路行去到一間好家庭式o既食堂，小湯米好勇敢叫o左阿寒名物Marimo 烏冬，即係將海藻整到球狀，真係幾似喎，好有特色同心思．不過味道就麻麻啦，小耳朵個正經豬扒烏冬好味D．家庭式食堂全店得一個女人做嘢，落order，斟茶，廚房，收銀，真係好佩服佢，如果真係咁樣可以養起全家人，真係唔到你唔服．食飽飽就去今晚冬華美會場望o下先，大會中間有個大舞台，前面有D小舖，後面就係兩間酒店，向外望就係無邊無際o既雪湖，好靚喔！

又四圍行搜尋地區限定Kitty，無咩發現，行番轉頭上阿奴族望下，同起網上見到個景一模一樣，好有特色．兩側係買店，中間上到頂係表演場地．不過間間舖賣D野都一模一樣，無咩新意．

係時候返酒店攞房，先行o下酒店地下個賣店，嘩！差不多每樣特產都有得試食，小湯米由頭食到尾，幾乎試晒咁多款，小耳朵只係試o左芝麻餅，唔錯，我地都有買到野o架，唔係o趙完鬆個隻．

跟往又上二樓望o下晚餐同埋早餐場地∼天河，都唔錯喎！無敵雪湖景，正！再去埋八樓望下浸溫泉先，又估唔到酒店裡面竟然會有圖書館，個溫泉∼∼梗係正啦！返落樓下攞房啦．我地好順利攞o左鎖匙，但係真係好唔慣有人咁跨張咁服待我地，個姐姐著住全套傳統靚靚和服，又頭到腳都一百分，佢幫我地攞住兩個望落去唔多乾淨o既大背囊，仲一路行一路Aligado，九曲十三彎終於到o左我地間房啦，佢開埋門，搬埋行李，好清楚解釋房內各樣設施，仲斟埋兩杯熱茶比我地，咁o既服務對小湯米小耳朵來講真係好唔自然，太好啦！我地cheap cheap 自由行一向都係攞o左鎖匙就自己攪掂，佢咁好服待攪到我地兩個有D唔知點算，真係唔好意思，終於決定比貼士佢，點知佢話為客人服務係佢地應該做o既，佢地係唔收貼士o架！仲好溫柔咁笑住出門口．

經過兩日無沖涼o既小耳朵梗係第一時間沖番個靚涼啦，點知和服姐姐又搞門，原來佢要問我地今晚想幾點開飯，我地今晚要睇冬華美，就早D食5:30-7:50pm啦．
拿拿林沖完涼即刻去八樓浸番個正正溫泉先，小耳朵呢世人第一次親身冰火浸，先起室內浸下各個大湯暖晒身，然後就去屋上露天風呂，上面落大雪，下面熱燙燙，終極享受，畢生難忘！小耳朵熱燙的身軀離開泉水接觸到阿寒低溫，在至回到室內約二十步的路程中，小耳朵如同小仙子般的化作一團煙飄至的感覺真係好好feel 喔！ 睇你點演繹啦，可以係露天風呂涷到阿媽都唔認得，咪以為好好風景，其實一來黑咪mung，咩都睇唔到得堆白煙，又大風雪，fing fing fung fung，起身返入室內o個陣仲標煙，凍到跳舞！不過人一世物一世，咩都係試o下o既！比我再揀一次，我都會再浸過！

浸完正正去二樓天河開飯，一個中國學生練習生服待得好週到，豐富食助晚餐後就起程去睇阿寒湖冬華美，會場就在結冰的阿寒湖上，大舞台上有古時武士首次發現＜火＞，視為珍寶，武士手持火把，邀請四位現場觀眾陪同，他們亦手持火把，步向台下正面對著的大柴堆，武士及四人同時用火把點著這大火堆，然後武士返回台上，四位觀眾亦可以得到紀念品T-Shirt一件，過程約十五分鐘，都幾好睇．

我地用o左Yen300買o左一個package，包括熱牛奶一杯，新鮮天婦羅魚仔同埋低溫體驗証書一張．

之後仲有花火大會，香港放煙花咁多次，小耳朵都無去過睇，今次係小耳朵呢世人第一次現場睇煙花，起大大片雪地上，人又唔多，好似企正起個煙花下面，望住佢一粒粒咁跌落來，真係好好feel，我諗呢種感覺起香港真係搵唔到．回味無窮喔！
睇埋阿奴族特色文族表演，咁就唯之Very Good啦．最過癮就係呢頭見佢地起自己個舖度買緊野，個頭就走o左上台表演歌舞同埋特色樂器，睇完表演行番酒店又見到佢地各自各起自己舖頭度賣野，真係身手敏捷．高手！佩服佩服！