十二月五日 (星期日）第 0 日
   
今日才執行理，所以一點才睡，可憐！
 
十二月六日 (星期一）第 1 日
   
大家開開心心齊上機，一個喼一個背囊瀟洒到痺！指定動作上機落機，到成田場兩點幾，因為早飛o左囉！所以用o左較多時間搵＜綠色窗＞都仲趕得切．搭三點鐘JR特急去東京，不過最後都只係淨番一分鐘時間比我地由＜綠色窗＞跑去Narita Express月台，真係好險！
     

起日本自由行，我當然是一個新手，新手當然有出錯，有錯當然值得原諒啦．你地知我有幾大壓力得o架！第一次出錯，行程去到池袋，明明係要起東口出，我地就去o左西口出，越行越遠就越唔對路，兩個家姐都不知幾擔心．所以我就發揮小宇宙，嘩！嘩！嘩！膽粗粗用日文去問路，嚇得我"標"晒冷汗，好彩好彩又比我問到喎！
   
   
"那那林"即刻去 Sunshine City 餃子城，全程最好味係＜雞亦餃子＞，其他不吃也吧！ Yen500 一客都幾貴！好！食飽返酒店休息．
   
十二月七日 (星期二）第 2 日
   

行程係去箱根大涌谷，又出錯啦！發雞肓見車就上，又無帶番副眼鏡，真撞鬼！結果坐快車變o左坐慢車，本來坐半粒鐘，而家坐足粒幾鐘，不過沿途可以睇多o的日本靚景，睇清楚o的日本o的屋係點樣o既．跟住就係接住落o黎每日指定動作∼問路∼．

 
     
今日天氣麻麻地，元箱根又大風又凍，所以能夠見到富士山頂o既時間連兩分鐘都無，真失敗！因為太大風，所以又無搭吊車ロープワエイ，教你地日文呀：ロープワエイは強い風の本日の營業運転を休止いたしております。真失敗！
   
大涌谷∼此地要有功夫底子先至好去，輕過九十磅唔好去，否則後果自負．話說有一個睇落去得九十磅o既阿婆，起強風吹襲之下，為保命死都攬住條電燈柱之際，就比我呢個"孔武有力"的善心人扶住佢走完一條長達五十米o既漫漫長路，將佢送到一個安全o既地方，都o左好事真係個人都開心o的．真係善有善報o架！（雖然未必即時報，但係長遠o的睇，又真係唔好唔信邪喎！）點解咁講？ロープワエイ"無情情"又開番喎，於是乎我地咪"拿拿林"坐吊車由大涌谷去強羅囉，又真係幾得意喎！
新發現介紹比大家知∼＜兩頭蛇鐵路＞，車長會時不時就由車頭行到車尾開一陣，跟住又由車尾行番去車頭又開陣，如是者十次八次，咁就可以將我地送到目的地啦．玩o左成日快累死，急不及待返酒店休息，飯又無食，唯有去Family Mart買麵食，真係可憐．
   
十二月八日 (星期三）第 3 日
   
好舒服咁睡了一覺，由夜晚九點到第二朝成七點，嘩！十個鐘，正！不過，美美就無咁爽啦，佢話比個枕頭整到頸痛，成晚無覺好瞓，唔"郁"得．大家坐低相量過後，決定＜出得o黎行無巨風浪就照跟行程！＞點知全日o既行程都好順利．不過美美就始終都係頸痛唔舒服，又嘔，我諗主要有三大原因∼(1) 巴士好鬼焗，(2) 我地方死執輸盡全力起超市度試食攪到太飽，(3) 她自己一向身體都唔係太好．由小涌園去到小田原都只係短短一個鐘頭四十五分鐘，我又發揮小宇宙去換o左早幾班火車飛 こだま 落大阪．
     

起月台見到子彈火車佢地好 high 呀！

當我地o架火車經過 あたみ 熱海，大家都諗起＜道明寺＞，嘻！
   
     
     
     
十二月九日 (星期四）第 4 日
   
一早去環球片場直到下午三點半，都幾好玩，之後去梅田行街，好攰！好攰！
   
     
   
十二月十日 (星期五）第 5 日
   
今日好早起身，因為又怕搵唔到 のりば ，八點就已經到o左天王寺站等八點十七分班車 なるは．好準時咁到達京都．京都係一個好地方，I like it！為o左＜大根焚＞即係蘿蔔節，甘願早o的起身，所以得得好o既回報．開心到好開心，超級開心的一個蘿蔔節！而嵯峨野就係一個風景靚絕o既好地方，如果早o的o黎到每山紅葉就真係 ＜一番＞啦！
     
     
   
十二月十一日 (星期六）第 6 日
   
今日去o左神戶異人館，不過就一個館都無入到，因為好似好無為咁．照行程去o左Ropeway遇到台灣團，當地導遊問我地要唔要團體票，平o的啩！＜好呀！＞你地估下幾多錢？之後去o左食好好味同埋好有氣勢o既正宗神戶牛柳，超正！又去o左行 Sogo 同埋 0101 ．佢地比較鍾意 Shopping，我地無跟行程去睇神戶港夜景．．．點解？因為我計劃搵藉口帶美美去睇醫生．
   
   

 
   

返到酒店，就去搵 Hotel Manager 石井さん幫我搵醫院，又用日文寫晒o的病症出來等我地可以比醫生睇，我識鬼寫咩，去到醫院見到醫生，嘩！醫生好靚仔呀！美美當然即刻不葯而愈啦．講下笑啫！

又到晚飯時候啦，當然係食好o野啦！就係墨魚丸同埋地道好味燒啦，本本旅遊書都有介紹o架，真係千祈咪錯過，好味好味，你都想試吓呀？自己搵啦！
   
十二月十二日 (星期日）第 7 日
   
一早起身準時返東京啦，真黑仔，ドアを閉めない！唔理咁多，照走可也！之後就好順利咁去坐火車ひかり 304 號返東京．今日行程好緊迫，先去淺草坐水上巴士，外型 Cyber 真一流，當係坐定定起隻船到就有o的 (>_<)"樣．
     
落船之後就行完一個商場又一個商場，然係就去o左大江戶溫泉物語浸浴．記住出露天足浴時，門口有浴衣任著，幾太都攞番件o黎著，唔係就會好似我地咁＜冷死＞．唔夠兩分鐘，三條雪條一齊走番入室內！回程坐無人駕駛火車，行程建議要坐第一行，我地三個就由車尾走到去車頭，感覺又幾得意喎！大家本來想去月島食好味燒，點知∼緊記七點前，想食就一定要七點前，否則，無得食！今晚我地又要食杯麵啦．真可憐！

   
十二月十三日 (星期一）第 8 日
   
全日行程取消，原因自己都唔知，原先改去上野國立科學博物館，聽聞係年中無休喎，但係我條命可能真係特別黑，等巴士無巴士，有巴士就失車搭到都遲到，忍唔住落車轉搭地鐵，路面就即刻唔塞車．十年都唔買一 Yen，一買o個日就係個 rate 最貴o個日，呢個＜黑＞字無得講，總之今日休息，連隔離上野動物園都休息，奇！唉！
 
為有轉去雷門行吓啦，兩個家姐日日都話要去，頭半粒鐘都無咩特別，相信大家都已經去過啦，唔使點講．我就比較鐘意行橫巷，一行就不得了，這條橫巷好鬼多o野賣，一行就行o左三粒鐘．今日都係買！買！買！當中仲巳括香港名產∼紅白藍膠袋．全日唯一跟番行程就係去東京鐵塔，真係好靚，如果未去過，真係應該去下喎！
   
十二月十四日 (星期二）第 9 日
   
一早去築地魚市場朝市，街市就唔講，都係講食啦∼超正魚生壽司，我仲好豪咁話＜呢餐我請！＞我地行吓行吓，見到一間＜大和＞問口好多人排隊，我地發揮香港人大無畏精神∼唔執輸你排我又排，足足排o左半粒鐘先等到位，Ann Ann 原來怕食生o野，不過佢性格可愛係一個開心果，又好奇勇於嘗試，見到佢食到想嘔個樣就好好笑，你有無食過呢間呀！埋單三個人一共Yen 9,600． q(>_<)p
 
跟住行程無改去秋葉原睇電器，不過真係要小心o的，起呢度買o野，隨時會去o左黑店都唔知，我受人所托買香水，足足比第二間舖貴 Yen 1000．之後就去o左原宿，涉谷同埋新宿行街，夜晚去埋歌舞伎町．美美同埋Ann Ann有o的不安覺得雜，唔夠半粒鐘就走人．你地去到o個度有無咩特別感覺呀！
   
十二月十五日 (星期三）第 10 日
   
不經不覺今日已經係＜十日危情＞最後一日，有o的失落，因為雷門已經去o左，所以朝上好輕鬆咁完成今日o既行程．食過早餐就安排兩位姐姐返房小休，自己就獨個兒去買 Skyliner 火車飛．九點半大家再一齊去上野國立科學博物館，都好值得去．之後∼買手信，買手信，同埋買手信囉！買到一身都係！仲以為自己番o左大陸，真奇怪．頂癮！
   
     
返到酒店執好行李就走人，每人一喼一背囊o既瀟洒樣已經不復再，家陣都係每人一喼一背囊，再加一手提袋，一盒手信，而我就再多o左紅白藍袋，本來五分鐘o既路程，好似行o左成粒鐘咁停低休息十次咁辛苦．到達成田空港，再買完最後幾盒手信就上機回香港．安全到達香港後，就收到小耳朵o既 message ，佢實在太擔心我呢個自由行新丁啦，唯有講聲∼多謝！